Shirka Ereybixinta Teknolojiyada af soomaaliga.

𝗠𝘂𝗾𝗱𝗶𝘀𝗵𝗼, 𝗧𝗮𝗹𝗮𝗮𝗱𝗼, 𝟭𝟳 𝗦𝗲𝗽𝘁𝗲𝗺𝗯, 𝟮𝟬𝟮𝟰:— Wasaaradda Isgaarsiinta iyo Teknolojiyada XFS ayaa Magaalada Muqadisho ku qabtay 𝗦𝗵𝗶𝗿𝗸𝗮 𝗘𝗿𝗲𝘆𝗯𝗶𝘅𝗶𝗻𝘁𝗮 𝗧𝗲𝗸𝗻𝗼𝗹𝗼𝗷𝗶𝘆𝗮𝗱𝗮 𝗔𝗳 𝗦𝗼𝗼𝗺𝗮𝗮𝗹𝗶𝗴𝗮, waxaana Daahfuray Ra’iisul Wasaare Ku-xigeenka Xukuumadda Jamhuuriyadda Federaalka Soomaaliya, Mudane Saalax Axmed Jaamac.

Shirka oo looga hadlay sidii uu afka Soomaaligu ula jaanqaadi lahaa isbeddelka Teknolojiyada, loona heli lahaa erey bixin ku habboon oo loo adeegsado, ayaa waxaa ka soo qeyb galay, Wasiiro ka tirsan Xukuumadda, Wasiirada Isgaarsiinta ee Dowlad Goboleedyada Dalka, Agaasinka Teknoolojiyada ee Gobolka Benaadir,

Guddiga Isgaarsiinta Golaha Shacabka, Guddoomiyaha Ururada Bulshada Rayidka, Shirkadaha Isgaarsiinta, aqoonyahanno iyo khubaro ku xeel-dheer afka iyo Aqoonta Teknolojiyada.

Guddoomiyaha Akademiye Goboleedka Af Soomaaliga (AGA) Professor Abdalla Mansuur iyo Guddoomiyaha Akademiyada Cilmiga, Dhaqanka iyo Suugaanta Mudane Ismaaciil Yuusuf Cusmaan oo ka hadlay Shirka ayaa Wasaaradda ku bogaadiyey Shirkaan, in Eraybixin loo helo Teknolojiyada waa mid aad loo sugaayey.

𝗫𝗶𝗹𝗱𝗵𝗶𝗯𝗮𝗮𝗻 𝗠𝗮𝘅𝗮𝗺𝗲𝗱 𝗔𝗮𝗱𝗮𝗻 𝗠𝗮𝗰𝗮𝗹𝗶𝗻 𝗖𝗮𝗹𝗶 (𝗦𝗼𝗼𝗺𝗮𝗮𝗹𝗶) Wasiirka Isgaarsiinta iyo Teknolojiyada oo Shirka khudbad ka jeediyey ayaa ku dheeraaday in horumar weyn laga sameeyey dhinacyada kala duwan ee Teknolojiyada, haddana erayo cusub oo ku saabsan ma aysan ku soo kordhin afka Soomaaliga…….”Ujeedada Shirkaan aan u qabanay waxay tahay in aan si qoto dheer uga wada hadalno sidii aan u horumarin lahayn erayada iyo fahamka Teknolojiyada iyadoo afkeena hooyo loo adeegsanayo, maadaama Wasaaraddu ay diyaarisay Shuruuc iyo Siyaasado kala duwan, baahina loo qabo in la raadiyo Erayada ku haboon Teknoolojiyada Casriga ah”…….ayuu yiri Wasiir Maxamed Soomaali.

Ra’iisul Wasaare ku-xigeenka, Mudane 𝗦𝗮𝗮𝗹𝗮𝘅 𝗔𝘅𝗺𝗲𝗱 𝗝𝗮𝗮𝗺𝗮𝗰, oo shirka hadal ka jeediyey, ayaa ku dheeraaday muhiimadda uu xilligani u leeyahay dalka in la helo ereyo ku habboon isticmaalka Teknolojiyada, si loo ilaaliyo af Soomaaliga, loogana maarmo adeegsiga ereyo laga soo minguuriyey afaf kale oo qalaad.

𝗦𝗵𝗶𝗿𝗸𝗮 𝗘𝗿𝗲𝘆𝗯𝗶𝘅𝗶𝗻𝘁𝗮 𝗧𝗲𝗸𝗻𝗼𝗹𝗼𝗷𝗶𝘆𝗮𝗱𝗮 𝗔𝗳 𝗦𝗼𝗼𝗺𝗮𝗮𝗹𝗶𝗴𝗮 ayaa muddo labo maalmood ah ka socondoono Magaalada Muqadisho, waxaana ka soo bixi doono Erayo hordhac u ah Teknolojiyada oo la jaanqaadi kara Af Soomaaliga.

……………………..

Wixii Faah-faahin ah kala xiriir

𝗔𝗯𝗱𝗶𝗿𝗮𝗵𝗺𝗮𝗻 𝗠𝗼𝗵𝗮𝗺𝗲𝗱 𝗔𝗹𝗶 “𝗗𝗶𝗶𝗻𝗶”

Xafiiska Warbaahinta & Xiriirka Dadweynaha

Wasaaradda Isgaarsiinta & Teknolojiyada.

Muqdisho, Soomaaliya

media@moct.gov.so

Twitter:

@MoctSomalia